Molimos o dili gyod nato sila limsan?

Sa akong tan-aw,  nagkadaghan man ang makililimos sa Cebu. Mao na kaha kini ang giingon ni climate change?

Kining ubang makililimos makaluluoy tan-awon. Mura’g wa gyo’y tarong kaon. Apan kung si Talya ang pasultihon mas niwang pa ko kay sa B****** nga makililimos sa Minglanilla. Hala, nakaabot sila ngadto?

Kanang namasko sa jeep, di ba nangayo man sila ug limos o nangayo ba’g pinaskuhan?

Makalibog. Kung dili ta molimos, mura ma’g dili mahingpit ang pagka-kristiyano. Apan ang paglimos lang ba maoy gitudlo ni Kristo?

Ako usa ka makililimos. Intawon limsi na ko ninyo’g gugma! Ambot lang!

Modernong Karomata

Makalibog, ingon sila mas nindot dunay LRT sa Cebu. Pero ingon siya mas maayo ang BRT para sa Sugbo. Unsa man gyod?

Nindot ang BRT kay minus gasto, gaan sa bulsa. Pero mas nindot daw ang LRT kay dako’g gasto, burot bulsa. Nganong lalisan man. Kung sa kabayo pa, ang sakto’g barog maoy pili-on. Di ba gusto lang nato mao lang ang modernong karomata?

Ambot lang!

Pagoryo-goryo

Niadtong gipriso pa si Erap, kanunay magsakit ang tuhod. Sa dihang nakagawas na, grabeng tuhora, lagsik pa man sa kang manang. Makaingon ta nga maayo gyod silang mag-inartista. Mailad gyod ta.

Matod pa ni Erap, siya ang maghiusa sa oposisyon para sigurado ang daog sa umaabot nga eleksiyon. Hiusa ba uroy nga nagpunay na man siya’g suroy-suroy. Unsa pa, nagpahumot kay modagan man siya. Abi niya’g wa ta kalimot. Watatits, pagoryo-goryo ra ka.

Ambot lang!

Mibalik ako

Taud-taud na gyod nga namingaw ang baryo Ambot lang. Ambot lang nganong nahilom ko. Wa man unta ko makalimot; wa man sab nasaag; ug labaw na nga wa man unta ko mipanaw nga sa ato pa karon dili pa ko multo.

Matod pa ni Noy Kanor, “hayan ang imong kalag gibati’g kalaay”. Kalag gyod?

Apan sama sa langgam Siloy sa Alcoy, mibalik gyod ko sa akong salag.

mibalik ako
kay gimingaw kanimo
(Kinutlo gikan sa kantang, Mibalik Ako.)

Gimingaw na baya gyod ko sa akong kanunay’ng pagpangambot. Gimingaw na ko sa akong payag. Gimingaw ko sa kahigayonan nga mapaambit ang huna-huna kong pingis kanunay.

Kumusta na kaha ang mga buotan kong higala? Nalutas na gyod tingali ko sa akong pagkalaagan kay bisan ang payag ni bai Clarence, ang Dahong Laya, mabisita lang nako matag takdol ug pagdulom sa buwan.

Kumusta na kaha si ma’am Tikya? Si bai Ramses, tinuod pa ba kaha ang iyang botbot? Kung sakto ang basa sa baraha ni Inday Koring, nan maingon nato nga si bai Ramses naghimo na sa iyang kaugalingong salag.

Kumusta na kaha si Darlene ug si Weng? Si Kungseng ug si Nep, gipunga na tingali sa kadaghan sa isyu ug panghitabo nga angay itaho. Kumusta na kaha ang Himantayon?

Gimingaw na sab ko sa bulawanon ug puno sa pagtulon-an nga lindog sa Tabu-an.

mibalik ako
kay gimingaw kanimo

Dili na man gyod unta ko gusto magpakaaron-ingnong buotan apan kay nataligsikan man ko, ato na lang agwantahon, kay unsaon mibalik na man gyod ko.

Ambot lang!

Kaon ug tagam

Kining uban dili gyod motagam.Bisan gipasidan-an na nga likayan ang tambok, mopuknit gyod, gi-atake hinoon.

Way kalainan sa pulitika. Daghan gyod dili motagam. Human gipalagpot ug napamatud-an nga nakahilabot ug dakong kantidad nga dili iya, naa lang gyod gihapo’y gusto ibalik si Erap Estrada pagka-presidente.

Pwera buyag, wa man tingali ni sila kahilisi. Wa gyod motagam.

Ambot lang!